يارب سالك بسورة طور والفجري           وبالقسم ذي في الفجر وسورة طور  

وبالليالي ذي سميتها العشر                      وبالكتاب الذي بطوري المصطور

ويسر الامر سالك واطلق العسر              وفرج الهم واشفه حالة المضرور

واكتب لنا ستر يامن بيدك الستر            ياساتر الحال لا تكشف على المستور

الخالدي قال يا نفسي علي قري               لا تجزعيني لغير الدحقة الممرور

لا ترخصيني كذا لا تجهلي قدري                 ياللاسف لا ترخص ما غلي ويبور

لا عادنا هون ساله يقصر العمري               ما بالحياه الرذيلة للعمر ماضور

لا عشت بالعز ساعة خير من شهري            وشهر واحد لا عدة سنه واشهور

يارب سالك عسى لا يكتشف سري              بيني وبينك سراير خلها مسرور

ما بي عدوي بما في حالتي يدري             ركبت راسي وبيدك قطبت الحنجور

وماكتب في جبين العبد ما عذر                من خير او شر ماحيله من المقدور

يالقلب خل المقادير التي تجري                رع ماحذر من قدر ينفع ولا تعذور

صبرك على الله وانا قدنا على صبري              لما تجي ليلة القدر  ويوم النور

يوم السعادة صباح الخير من بدري             نادى المنادي بكسر الحلقة المزرور

ذي كسر القيد واتخلص من الاسر             ذي كان مسجون بالقيد الشفي ماسور

ياسعدنا ذي صدفنا ليلة القدر                 وصادف الضيف يوم اينفخوا بالصور

جمال نادى بصوت المجد والنصر                 وحطم الخاين المستعمر المغرور

وقام نصر العرب بالبحر والبر                 واصبح الحكم بيد الشعب والجمهور

وطهروا دحقة اهل الملة الكفر                 بسعد ناصر رئيس الوحدة المنصور

وبسعد سلال صنعاء صاحب الفخر      ذي صيته اصبح على رغم العدو مشهور

هدم قصور الامامه واخرج البدر                  وتاج المملكه خرج منها مقهور

واخوانه اتقدموا للذبح والجزر                    كلن تجازي بما قدم جزاء معشور

وين الطغاة الذي اتولو الأمر                  وين أهل بيت الامامه بعد هدم الدور

نصر العرب قام بعد اليوم ما عذري             كلن يجاهد على عز الوطن ويثور

بانكسر الخصم ذي عازم لنا الكسري              ولا قده لا محاله بالخطر مكسور

حتى ولا حد ولا لا ضرب صدري                     ولا تقفز قده بالحنجره مزقور

وذي بردفان خلوا راسه اتعطري                   وكل ما قام بايرجع في العرور

والرجعية ذي يبيعون الوطن مسري             بانكشف اعمالهم كمن ذنب ماجور

وبايلاقون يوم الويل والشر                       لاهم يبو بايبيحوا لي وطن مجور

هلاكهم بايقع والذبح والنحر                    والموت ناضر لهم قد قبرهم محفور

من جيز ذي حل ذبحه باول الفطري         وذي لحق بعد شهر العيد في عاشور

بسعد سلالنا والفارس المصري                باننتصر على الخون وانقلع الماثور

وانضرب الكلب والخنزير والعري              ولحدى الشوم ذي عالمجزرة بتدور

صلوا على من شفع من حرت الجمري            شفيعنا من حميم النار ذي بتفور

عسى يشفع لنا من لزة القبر                 نكتب مع اهل السعادة في جنان الحور